د شوروي اتحاد په ماتولو سره ټوله نړۍ د افغانانو د احسان پوروړې ده
د مهاجرینو او راستنېدونکو چارو وزارت سرپرست الحاج خلیل الرحمان حقاني د ٢٦ تم د دلو په مناسبت، د جهادي ارزښتونو د ساتنې او پالنې تر عنوان لاندې فرهنګي غونډې ته په وینا کې وویل، زرګونه شهیدان، بندیان او معیوبین مو د اسلامي شریعت د نفاذ لپاره ورکړل، اوس چې اسلامي نظام نافذ دی مونږ یې باید شکر ادا کړو
نوموړي زیاته کړه، په اتلولۍ او میړانه کې مو د بدر او احد د شهیدانو پیروي وکړه اوس یې په ساتنه کې هم د هغوی په څېر قربانیو ته اړتیا ده
ښاغلي حقاني وویل، ټوله نړۍ د افغانانو د احسان پوروړې ده، ځکه د روسانو هدف یوازې افغانستان نه بلکې له دې لارې د ټولې نړۍ مهارول وو
نوموړي همدا راز زیاته کړه، د مجاهدینو تر منځ هیڅ توپیر نشته، که چا مجاهد ته ځای ورکړی، چا ډوډۍ ورکړې، چا د روس پرضد جهاد کړی او که چا د امریکا پرضد جهاد کړی، ټول یو مجاهدین دي او مونږ یې باید قدرداني وکړو
ښاغلي حقاني د فرهنګي جهاد په ډګر کې د حماسي شاعرانو او ترانه ویونکو ستاینه وکړه او ددوی شعرونه یې د جهاد د سنګرونو تودو ساتلو ابزار وبلل