د ترکيې د سرې مياشتې رئيس مالي او اداري مرستيال سره ليدنه وکړه
په کابل کې د ترکيې د سرې مياشتې رئيس فريد احمد ضیا د مهاجرينو او راستنېدونکو چارو وزارت مالي او اداري مرستيال محمد ارسلاح خروټي سره ليدنه وکړه او د دواړو ادارو ترمېنځ د همکاريو د دوام او پراختيا په اړه يې خبرې وکړې.
په دغه ناسته کې چې دوشنبه د لړم په ( ۲۴) مه وزارت په مرکزي دفتر کې ترسره شوه، ښاغلي خروټي د دواړو هېوادونو ترمېځ ښو اړېکو ته په اشارې سره د دواړو ادارو ترمېنځ د همکاريو پراختيا بېځايه شوو او اړمنو خلکولپاره مهمه وبلله او د مهاجرينو وزارت لومړيتوبونه يې له دوی سره شريک کړل.
همدارنګه د ترکيې د سرې مياشتې ادارې څخه يې غوښتنه وکړه، چې د افغانانو د بشري اړتياوو په ځانګړي توګه د بېځايه شوو او راستنېدونکو د بيامېشتېدنې په برخه کې د مهاجرينو وزارت سره لا زياته همکاري وکړي.
هغه زياته کړه چې اوسمهال په ټول هېواد کې امنيت دی او اړتيا ده،چې داخلي بېځايه شوي خپلو اصلي سيموته ستانه شي.
په ورته وخت کې په کابل کې د ترکيې د سرې مياشتې ادارې رئيس د ترکيې څخه افغانستان ته د راستنېدونکو کډوالو لپاره ددې ادارې د کاري پلانونو په اړه معلومات ورکړل او داخلي بېځايه شووته د بشري مرستو دوېش په برخه کې يې د وزارت سره دهمکاريو خبر ورکړ.
