د بې ځایه شویو او راستنېدونکو د اړتیاوو د پوره کولو هر اړخیز پلان د څلورو وزارتونو له استازو سره لاسلیک شو.
د راستنېدونکو او داخلي بې ځایه شویو د اړتیاوو د پوره کولو هر اړخیز پلان د مهاجرینو او راستنېدونکو چارو وزارت په مسلکي معینیت کې د اقتصاد، مالیې، کرنې، کور او ښار جوړونې وزارتونو د استازو په شتون کې لاسلیک شو.
د وزارت مسلکي مرستیال مولوي عبدالرحمن راشد وویل: موږ کولای شو په دې پلان کې له یو بل سره په ګډو هڅو او ګډې همکارۍ سره د راستنېدونکو او داخلي بې ځایه شویو ستونزو ته په ښه توګه رسېدنه وکړو.
د دغو وزارتونو استازو په دې پلان کې ګډې موخې ته د رسېدو په موخه پر لا زياتې همکارۍ ټينګار څرګند کړ.
