د افغانستان لپاره د (UNHCR) ادارې له نوي رئیس سره ناسته ترسره شوه
![-](/sites/default/files/2024-07/whatsapp_image_2024-07-27_at_3.25.55_pm.jpeg)
په افغانستان کې د کډوالو لپاره د ملګرو ملتونو عالي کمشنرۍ نوي رئیس ښاغلي عرفات جمال د مهاجرینو او راستنېدونکو چارو له سرپرست وزیر الحاج خلیل الرحمن حقاني سره د هغه په دفتر کې ولیدل
په ناسته کې د مهاجرینو چارو وزیر نوموړي ته ښه راغلاست او په دنده کې د موفقیت غوښتنه وکړه او هیله یې څرګنده کړه، چې په راتګ سره یې د مهاجرینو ستونزو ته په ښه توګه رسیدګي وشي
ښاغلي عرفات جمال د مهاجرینو چارو وزارت سره په ګډه کار، د لا همغږیو رامنځته کول او په ګډه د غوره کړنلارو جوړول له خپلو لومړیتوبونو څخه وبلل او زیاته یې کړه، چې د مهاجرينو ستونزو ته د رسیدګۍ لپاره باید له کوربه هېوادونو سره همغږي زیاته، د راستنېدنې پروسه اسانه او دلته د روغتیا، تعلیم او په نورو برخو کې پروګرامونه په کار واچول شي او دایمي حللارې پیدا کړل شي
د مهاجرینو چارو وزیر په خپلو خبرو کې اوویل: څرنګه چې د مهاجرینو موضوع بشري موضوع ده، نو له دوی سره مرستې هم باید په بشري احساس وشي
نوموړي وویل: د مهاجرینو چارو وزارت پنځه کلن ستراتيژيک پلان لري، چې د راستنېدنې، بیا میشتېدنې او دایمي ادغام پورې ټوله پروسه پکې په نظر کې نیول شوې، ددغه ستراتیژیک پلان په تطبیق کې باید همکاري وشي
ښاغلي حقاني ټینګار وکړ، چې مرستې دې د کار په بدل کې ورکړل شي، موسسات دې خپل اداري مصارف کنټرول کړي او زیات تمركز دې د اړمنو په ستونزو وکړي
د وزارت د پلان او پالیسۍ رئیس مولوي محمود الحق احدي وویل: پروژې باید د وزارت سره په ګډه پلان شي او په بې ګټې پروژو بودیجه مصرف نشي