د قطر سفیر د مهاجرینو چارو له سرپرست وزیر سره ولیدل
په کابل کې د قطر اسلامي دولت سفیر ښاغلي سعید بن مبارک الخیارين د مهاجرینو او راستنېدونکو چارو له سرپرست وزیر الحاج خلیل الرحمن حقاني سره د هغه د کار په دفتر کې ولیدل
په پیل کې د مهاجرینو چارو وزیر د راستنېدونکو مهاجرینو په ستونزو او اړتیاو خبرې وکړې، نوموړي د افغانستان سره د قطر هېواد همېشنۍ همغږي او مرستې وستایلې او زیاته یې کړه، د ژمي په رارسېدو سره د مهاجرینو ستونزې زیاتې شوي دي، د مهاجرینو چارو وزارت د خپل پلان له مخې هڅه کوي ددوی ستونزو ته رسیدګي وکړي او په دې برخه کې د بشرپاله هېوادونو مرستو ته هم اړتیا ده
د قطر سفیر وویل، له افغانانو سره اړیکې زه د ځان لپاره ویاړ ګڼم، قطر هېواد د زلزله ځپلو سره هم ٦٠ ټنه د خوراکي او غیر خوراکي توکو مرستې وکړې او د مهاجرینو لپاره به هم خپلې هڅې ونه سپموو
نوموړي وویل، څو ورځې مخکې په دوحه کې د اسلامي هېوادونو یوه ناسته وه، چې په هغې کې د افغانستان په ملاتړ ټینګار وشو او د بشري مرستو په اړتیا هم خبرې وشوې
