د کډوالو عالي کمشنرۍ د اسیا او پاسفیک دفتر مشر د مهاجرینو چارو وزیر سره وکتل
د کډوالو په چارو کې د ملګرو ملتونو عالي کمشنرۍ د اسیا او پاسفیک سیمه ییز دفتر مشر ایندریکا راتوتي د مهاجرینو او راستنېدونکو چارو له سرپرست وزیر سره د هغه په دفتر کې ناسته وکړه
په دغه ناسته کې په نورو هېوادونو په ځانګړي ډول پاکستان او ایران کې د مهاجرینو او دننه په افغانستان کې د داخلي بې ځایه شوو په ستونزو او مشکلاتو خبرې وشوې
ښاغلي راتوتي په کارونو او دایمي حللارو کې د مهاجرینو چارو وزارت همغږي او همکاري موثره وبلله او په دې برخه کې د همکارۍ مننه یې وکړه، نوموړي په تېرو کړنو رڼا واچوله او زیاته یې کړه، نږدې وخت کې به پاکستان ته هم ولاړ شي او له پاکستاني چارواکو سره به د مهاجرینو د اسنادو تمدید او بې اسنادو مهاجرینو ته د اسنادو په ورکولو خبرې وکړي
ښاغلي حقاني نوموړي ته د ښه راغلاست ترڅنګ وویل: ناستې او خبرې باید نتیجه لرونکې او ګټه یې ولسونه په سترګو وویني، ښاغلي حقاني ټینګار وکړ، چې د ژمي له رارسېدو مخکې بشري مرستې اړمنو ته ورسول شي
نوموړي د موسساتو په بې طرفۍ او اصولو او قوانینو ته په ژمنتیا ټینګار وکړ.
