کډوالو وزير د افغان کډوالو وضعيت ښه والي په اړه د جاپان سفير سره خبرې وکړې
د کډوالو او راستنېدونکو چارو وزير سيد حسين عالمي بلخي په کابل کې د جاپان سفير ميتسوجي سوزوکا سره په ايران او پاکستان کې دافغان کډوالو وضعيت ښه والي او له کوربه هېوادونو څخه د افغان متخصصينو د راستنېدو په اړه خبرې وکړې.
دکډوالو وزير په دغه ناسته کې، چې د ليندۍ په ۱۱مه د وزارت مقام کې ترسره شوه، د جاپان هېواد له همکاريو په ځانګړي توګه دکډوالو په برخه کې دهغې دهمکاريو قدردانی وکړ او د چاپان له حکومته يې وغوښتل، چې په پاکستان کې دکډوالو په کمپونوکې د ښوونکو ملاتړ ، زياتولو او په ايران اکې دافغان کډوالو د روغتيايي بيمې ملاتړ په برخه کې همکاري وکړي.
هغه زياته کړه، چې د جاپان حکومت کولای شي په ايران او پاکستان کې دملګرو ملتونو دکډوالو ادارې له لارې دغو سيمو کې دافغان کډوالو سره مرستې وکړي.
عالمي بلخي د کوربه هېوادونوڅخه د افغان کارپوهانو د بېرته راستنېدو غوښتنه وکړه، چې دچاپان حکومت له لورې يې مالي ملاتړ کېږي، ترڅو دکډوالو ظرفيت په اغېزمنه توګه د هېواد پرمختګ او ودې لپاره وکاروي.
د جاپان سفير د متخصص راستنېدونکو د برنامې د اغېزمنتوب څخه خوښ و ويې ويل، زموږ موخه دمسلکي راستنېدونکو ملاتړ کول دي، ترڅو افغانستان وکولای شي د خپل هېواد د پرمختګ او بيا رغونې لپاره دخپلو کډوالو ځواک او وړتيا وکاروي.
هغه وويل، چې دکډوالو وزارت د ښوونځيو د ساتنې او دکډوالو د روغتيايي بيمې لپاره د جاپان حکومت سره اداري همغږۍ ته اړتيا لري او دا غوښتنه به يې د مرکز حکومت سره شريکې کړي.
په ورته وخت کې درې تنه راستنېدونکي، چې د کډوالو چارو وزارت په مربوطاتوکې دندې لري، په ناسته کې ګډون کړی و او د جاپان سفارت څخه يې وغوښتل چې د متخصص راستنېدونکو برنامې لپاره خپل ملاتړ زيات کړي.
