مالي او اداري مرستيال د کډوالو او بېځايه شوو دشمېر وړاندې کولو کې د نړيوالو بنسټونو پر دقت ټينګار وکړ
د کډوالو او راستنېدونکو چارو وزارت مالي او اداري مرستيال ولي الله جلال په افغانستان کې د کډوالۍ نړيوال سازمان (IOM) چارواکو سره په ناسته کې د وزارت سره په همغږۍ او دکډوالو او بېځايه شوو خلکو د کره شمېرو پر دقت ټينګار وکړ.
په دغه ناسته کې چې د کډوالو وزارت د پالېسۍ او پروګرامونو مرستيال شېر علم امله وال هم شتون درلود، ښاغلي جلال دمشورتي برنامو په رامنځته کولو او د کډوالو او بېځايه شوو خلکو لپاره د کاري زمينې پر برابرولو ټينګار وکړ ويې ويل: بې روزګاري دکډوالۍ يو له اصلي علتونو څخه ده، نو له همدې امله ملي او نړيوالو بنسټونو ته پکار ده، چې په دې برخه کې عملي او مؤثر اقدامات په بشپړه همغږۍ کې ترسره کړي.
په افغانستان کې د کډوالۍ نړيوال سازمان (IOM) چارواکو د ننګونو په څرګندولو سره زياته کړه، چې دوی هڅه کوي په ولايتونوکې د کډوالو وزارت رياستونو سره په همغږۍ شمېرې وړاندې کړي؛ ملګر د يومنظم سيستم ( بايومټريک) نه شتون د سمو او کره شمېرو د ستونزو لامل کېږي.
دهغه په خبره د (IOM) دفتر په هېواد کې بېځايه شوو او راستنېدونکو لپاره د مشورې ورکولو، بشري مرستو او کار ته د لاسرسي په برنامو کار کوي او هڅه کوي دې پروګرامونو ته په پراخه کچه دوام ورکړي.
په پای کې مالي او اداري مرستيال د کډوالۍ نړيوال سازمان دهمکاريو ستاينه وکړه ويې ويل: وزارت د احصائيې او معلوماتو ادارې او يوشمېر نورو ملي او نړيوالو ادارو سره په ګډه کار کوي ترڅو دمعلوماتو يو هر اړخيز مرکز رامنځته کړي، چې کره شمېرو ته د لاسرسي په برخه کې ستونزې حل کړي.
