د کډوالو او راستنېدونکو چارو وزارت مقام د دفتر رییس له همکارو ادارو سره ولیدل
محترم مولوي سعید احمد بنوري د کډوالو او راستنېدونکو چارو وزارت مقام د دفتر رییس، د خپل کاري سفر پر مهال ننګرهار ولایت ته د همکارو ادارو د یو شمېر استازو سره لیدنه او خبرې وکړې.
په دې لیدنه کې د وزارت د دفتر رییس د یادو ادارو له همکاریو څخه مننه وکړه او ویې ویل: موږ له تاسو سره همکار یو او اوږه په اوږه درسره ولاړ یو. هره ستونزه، چې وي، موږ به یې له مرکزه سره شریکه کړو. د مهاجرینو سره مرسته کول؛ یو انساني او بشري عمل دی چې باید یوازې د الله (ج) د رضا لپاره ترسره شي او په دې برخه کې باید له هیڅ ډول هڅې ډډه ونه شي.
همدارنګه ښاغلي بنوري د یادو ادارو د کارکوونکو ستونزې له نږدې واورېدې او ډاډ یې ورکړ، چې یاده موضوع به د کډوالو چارو وزارت مشرتابه سره شریکه کړي. نوموړي زیاته کړه، چې هر ډول اسانتیاوې او همکاري، چې اړتیا وي له همکارو ادارو سره به شریکه شي.
