کډوالو وزارت د ظرفيتونو لوړونې برنامه وڅېړل شوه
د وري په ۲۲مه د کډوالو او راستنېدونکو چارو وزارت د ظرفيتونو لوړونې برنامې د څېړلو سربېره ځانګړی ورکشاپ جوړ او په پرې خبرې وشوې.
په دغه ناسته کې د کډوالو او راستنېدونکو چارو وزارت د پناه غوښتونکو مرستيال وفي الله کاکړ د وزارت يوشمېر مرکزي رئيسانو، د کډوالۍ نړيوال سازمان (IOM) رئيس، په کابل کې د اروپايي ټولنې د پراختيايي برخې استازي او په افغانستان کې دکډوالو د پالېسۍ پراختيا لپاره د (ICMPD) نړيوال دفتر رئيس شتون درلود.
په لومړي سرکې ښاغلي وفي الله کاکړ دغه اقدام کډوالو، راستنېدونکو او داخلي بېځايه شوو ته د دغه وزارت له خوا د غوره خدماتو وړاندې کولو په لاره کې يو مثبت ګام وباله او د برنامې له پيل څخه يې خوښي څرګنده کړه او د برنامې په پلي کولو او د وزارت د کارمندانو ظرفيت لوړولو کې مثبتې پايلې ترلاسه کولو لپاره د دواړو لوريو ترمنځ دهمغږۍ او ګډې همکارۍ په زياتوالي باندې ټينګار وکړ.
سربېره پردې د پناه غوښتونکو مرستيال ددې برنامې پلي کولو لپاره هر اړخيزې ستراتېژۍ جوړولو باندې ټنګار وکړ ويې ويل: په دغه برخه کې به دکډوالۍ نړيوال سازمان سره په ګډه کار وکړي. نوموړي د کډوالو په برخه کې د وزارت او بنسټونو ترمنځ د همغږۍ کچه ښه وبلله او دې پروسې ته پردوام ورکول يې ټينګار وکړ.
په ورته وخت کې د کډوالۍ نړيوال سازمان ( IOM ) رئيس دکډوالو چارو وزارت د پناه غوښتونکو مرستيال او د ورکشاپ ګډونوالو څخه مننه وکړه او د برنامې پلي کولو ملاتړ سربېره يې کډوالو وزارت سره په بېلابېلو برخوکې د همکاريو پردوام ټينګار وکړ.
همدارنګه د اروپايي ټولنې استازي يما عمري د کډوالۍ په برخه کې د اروپايي ټولنې پردوامداره همکارۍ او علاقمندۍ ټينګار وکړ او د ورته برنامو پلي کولو لپاره يې خپل ملاتړ څرګند کړ. د کډوالو وزارت د ظرفيتونو لوړاوي پروګرام د کډوالۍ نړيوال سازمان او په ځانګړي ډول د رادا پروژې ( د افغان راستنېدونکو بيا يوځای کېدو او پراختيا يي مرستي) دد وزارت لپاره په پام کې نيول شوي.
دغه برنامه د راستنېدونکو د بيايوځای کېدو په برخه کې د رادا پروژې لويه برخه ده چې داروپايي ټولنې خوا تمول شوې او د کډوالو او راستنېدونکو چارو وزارت تر نظارت لاندې د کډوالۍ نړيوال سامان IOM له خوا پلي کېږي.
