فراه ولایت مهاجرینو ریاست لپاره نوی رییس معرفي شو
د اسلامي امارت زعیم عالیقدر امیر المومنین د حکم له مخې مولوي عبدالغني احسان په دویم بست کې د فراه ولایت د مهاجرینو رییس په توګه د یو لړ مراسمو په ترڅ کې چې د دې ولایت مرستیال والي مولوي عبدالکریم جهاد یار او د مهاجرینو وزارت مسلکي معین مولوي عبدالرحمن راشد ګډون درلود؛ دنده پیل کړه.
ښاغلي راشد د ګمارنې فرمان ولوست او په دغه ولایت کې یې د بې ځایه شویو او راستنو شویو کورنیو ته د لا ښه خدمت په موخه نوي رییس ته د بریا هیله څرګنده کړه.
مسلکي معین هیله وښوده، چې د ښاغلي احسان په راتګ سره به د فراه اوسېدونکو ته ګټور خدمتونه ترسره شي.
د فراه مرستیال والي مولوي عبدالکریم جهاد یار نوي رییس ته د مبارکۍ تر څنګ وویل، چې د خدمتونو په وړاندې کولو کې زیاتې هڅې وکړي او د ریاست له کارکوونکو یې وغوښتل چې له نوي رییس سره بشپړه همکاري ولري.
د فراه د مهاجرینو نوي رییس مولوي عبدالغني احسان د اسلامي امارت له رهبرۍ مننه وکړه او زیاته یې کړه، چې د ریاست کارکوونکو په همکارۍ به د دې ولایت اوسېدونکو ته اړین خدمتونه وکړي.
