د کډوالو او راستنېدونکو چارو وزیر محترم مولوي عبدالکبیر خوست ولایت ته د سفر په ترڅ کې د ګربزو له علماوو او قومي مخورو سره وکتل
په دې ناسته کې د ګربزو قومي مشرانو او علماوو د اسلامي امارت لخوا د ورسره شویو همکاریو له امله مننه وکړه او زیاته یې کړه، چې د اسلامي نظام له ټينګښت وروسته یې ګڼې ستونزې د حکومت په مرسته حل شوې دي.
حاضرو مشرانو او علماوو د خوست ولسونه د اسلامي امارت پوځ یاد کړ او د اسلامي نظام د ساتنې په برخه کې یې د هر ډول همکارۍ ډاډ ورکړ.
د ناستې پر دوام د ګربزو علماوو او مشرانو په خپله سیمه کې د سړک رغولو وړاندیز له محترم وزیر سره شریک کړ.
محترم مولوي عبدالکبیر خوست ته په خپل سفر خوښي څرګنده کړه او له اسلامي امارت سره یې د خوست د ولسونو همکارۍ ارزښتمنې وبللې.
محترم وزیر زیاته کړه، چې اسلامي امارت پر ولس تکیه لري او د حکومت ټولې چارې د شریعت په رڼا کې پر مخ روانې دي.
محترم مولوي عبدالکبیر د ولس خدمت خپل مسوولیت یاد کړ او د ګربزو په ولسوالۍ کې یې د خلکو لخوا د رغېدونکي سړک له چارو سره نغدي مرسته وکړه.
