د وزارت مسلکي مرستیال د فاریاب والي سره ولیدل
د مهاجرینو او راستنېدونکو چارو وزارت مسلکي مرستیال مولوي عبدالرحمن راشد فاریاب ته د خپل سفر په دوام د دغه ولایت والي عبدالاحد فضلي سره ولیدل.
په دې لیدنه کې مسلکي مرستیال فاریاب ته د خپل سفر موخې، د بېځایه شویو او راستنو شویو ستونزې، د مهاجرینو ښارګوټو غصب شوې ځمکې او دې ستونزو ته د حللارو موندنې د فاریاب والي سره شریکې کړې.
د فاریاب والي ښاغلي راشد ته د ښه راغلاست ترڅنګ د خپلې همکارۍ ډاډ ورکړ او ویې ویل: په ګډه به د یوې موخې لپاره کار کوو، چې هغه د مهاجرینو سوکالي ده.
د یو بل خبر له مخې د مهاجرینو او راستنېدونکو چارو وزارت مسلکي مرستیال مولوي عبدالرحمن راشد د چین هېواد مرسته چې ۲۰۰ خیمې او یو هایلکس موټر و، د فاریاب د مهاجرینو ریاست ته وسپارله.
