د مهاجرينو چارو وزارت چارواکو او (IOM) دفتر د استازو ترمنځ ګډه ناسته ترسره شوه
دغه ناسته د مهاجرينو چارو وزارت د دفتر رئيس، د څېړنې رئيس او د مهارت نړيوال سازمان (IOM) د استازو ترمنځ ترسره شوه، چې پکې په سرحدونو کې راستنېدونکو ته د غوره خدماتو د وړاندې کولو په اړه خبرې وشوې.
په ناسته کې، چې چهارشنبه د سلواغې په (۵) مه په وزارت کې ترسره شوه، د نيمروز ولايت د ورېښمو پل او هرات ولايت د اسلام قلعه له لارې راستنېدونکو ته د غوره خدماتو رسولو پر څرنګوالي اود مرستو د وېش په اړه خبرې وشوې.
د مهاجرينو چارو وزارت چارواکو د (IOM) د فتر له مسؤلينو څخه غوښتنه وکړه، چې په پوله کې دې راستنېدونکو سره بشري مرستې زياتې شي، د اسلام قلعه او ورېښموپل په صالونونو کې دې راستنېدونکو ته د خوراکي توکو کيفيت ښه شي او د ترانسپورت د لېږد په برخه کې دې ورسره نغدي مرستې ترسره شي، ترڅو وکولای شي په خپله خوښه خپل منزل ته ورسي.
د مهاجرت نړيوال سازمان استازو وويل، د دواړو لوريو موخه داده، چې مهاجرينو ته ښه خدمات وړاندې کړي.
موږ غواړو چې په ټولو راستنېدونکو مرستې ووېشل شي، خو د بوديجې د کمښت له امله له راستنېدونکو سره زموږ مرستې هم کمې شوي دي.
هغوی وويل، چې د (۲۰۲۲) کال په وروستيو دوو مياشتو کې هر مياشت لس زره خلکو سره د دوی له لورې بشري مرستې ترسره کېدې ، چې اوس په پلان کې ده، چې هره مياشت دوه زرو کسانو سره مرستې ترسره شي.
