د مهاجرينو چارو وزارت سرپرست د ژغورنې نړيوالې کمېټې د خونديتوب برخې له مسؤل سره ليدنه وکړه
د مهاجرينو چارو وزارت سرپرست الحاج قاري محمد اجمل وياړ په افغانستان کې د ژغورنې نړيوالې کمېټې د خونديتوب برخې له مسؤل ښاغلي کنيفن موريتي سره د چنګاښ په ( ۱۸) مه په خپل کاري دفتر کې ليدنه وکړه.
په دې ليدنه کې ښاغلي موريتي د هېواد په څلورو ولايتونو کې د اړمنو او مستحقو کورنيو لپاره د دغې ادارې د فعاليتونو په اړه معلومات ورکړل.
د مهاجرينو چارو وزارت سرپرست د مرستو رسولو په برخه کې د يادې ادارې د فعاليتونو څخه مننه وکړه او غوښتنه يې وکړه، چې هغه سيمو کې له امړنو کورني، خپلې مرستې ډېري کړي، چې په تېرو کلونو کې ورسره بشري مرستې نه دي ترسره شوي.
په ياده ناسته کې د پلان او پالېسۍ سرپرست مرستيال مولوي محمود الحق احدي هم شتون درلود او په هغه سيمو کې يې د مرستو د زياتوالي غوښتنه وکړه، چېرته چې راستانه شوي بېرته خپلو اصلي ځايونو ته ځي.
ښاغلي موريتي د يادې ادارې د همکاريو د دوام په اړه ډاډ ورکړ.
په پام کې ده، ډېر ژر په خوست، هرات، ننګرهار او لغمان ولايت کې د مرستو رسولو په موخه د يادې ادارې او مهاجرينو چارو وزارت له لورې د همکاريو هوکړه ليک لاسليک شي.
