د مهاجرت نړيوال سازمان د مهاجرينو چارو وزارت سره خپلو همکاريو ته دوام ورکوي
د مهاجرت نړيوال سازمان مسؤولينو د مقام د دفتر رئيس قاري محمد اجمل وياړ سره په ليدنه کې له راستنېدونکو سره د خپلو مرستو د دوام ډاډ ورکړ.
په دې ليدنه کې د مقام د دفتر رئيس د ياد سازمان د تېرو همکاريو څخه مننه وکړه او له هغوی څخه یې د راستنېدونکو د ستونزو د حل په موخه د پکتيا او پکتيکا ولايتونو په سرحدونو کې د خدماتو د وړاندې کولو په پار د دفترونو د فعالولو غوښتنه وکړه.
د داخلي بېځايه شوو وضعيت ته د رسېدو رئيس مولوي سردار محمد شېرزاد او د مرستو د همغږۍ رئيس شېخ عبدالرحمن رحماني، چې په دې ليدنه کې يې شتون درلود، له پاکستان څخه یې د افغان راستنېدونکو د جدي ستونزو يادونه وکړه او د حل په برخه کې يې د لا زياتو مرستو غوښتنه وکړه.
په سرحدونو کې د مرستو د همغږۍ مسؤولې اغلې انګهراد او د دې ادارې د اړېکو مسؤول عبدالوارث وويل، چې د مهاجرينو چارو وزارت سره په همغږۍ به د شته امکاناتو په لرلو سره خپلو مرستو ته دوام ورکړي.
انګهراد زياته کړه، چې دا مهال د افغانستان په پولو کې د يادې ادارې دفترونه له نورو مرستندويه مؤسسو سره په تفاهم له راستنېدونکو سره خپلې مرستې ترسره کوي او د بوديجې په زياتوالي سره به خپلې مرستې لا زياتې کړي.
