د المان د پارلمان ستر سلاکار د مهاجرینو وزارت له مرستیال سره ولیدل

د افغانستان په اړه د آلمان د پارلمان د دوو څارونکو کمیسیونونو ستر سلاکار پروفیسور هنس دوبه او مل پلاوي د مهاجرینو وزارت له مسلکي مرستیال عبدالرحمن راشد سره د ده په خپل کاري دفتر کې ولیدل.

ښاغلي دوبه وويل: افغانستان ته زما د سفر موخه دا ده، چې حقیقتونه له نږدې ووینم او د المان خلکو ته يې ور ورسوم او د دغه هېواد له واقعيتونو څخه ولس ته خبر ورکړم، په المان کې ډېرې شبکې لېواله دي، چې له ما سره مرکه وکړي او د افغانستان حقیقتونه بیان کړم.

زه هڅونه کوم، چې خلک راشي او دا ښکلی هیواد له نږدې وګوري.

هغه وویل: د ۲۰۲۱ کال له بدلون وروسته زرګونه کسانو آلمان ته پناه وړې ده، هغوی وايي ژوند یې له خطر او ګواښ سره مخ دی، د دغو کډوالو له جملې څخه به یې ځینې قبول شي، خو ځینې نور ښایي له آلمان څخه وتلو ته اړ شي.

مسلکي مرستیال زیاته کړه، خوښ یم چې تاسو حقایق له نږدې وینئ او انعکاس کول یې غواړئ، ترڅو په بهر کې خلک خبر شي چې اسلامي امارت له فتحې وروسته د بښنې فرمان عملي کړی او هېچاته ځور او اذیت نه رسېږي.

موږ د شريعت له اصولو سره سم کار کوو، هېڅکله مو د امير د حکم خلاف کار نه دی کړی او نه څوک ځورول شوي.

ښاغلي راشد وویل: موږ د المان له حکومت څخه غوښتنه کوو، چې افغانان په جبري توګه و نه باسي او که هغوی په خپله خوښه راستانه شي، موږ به یې هرکلی او ملاتړ وکړو او په دې برخه کې د المان له حکومت څخه د همکارۍ غوښتونکي یو.

پروفیسور دوبه زیاته کړه، ستاسو پیغام به د برلین پارلمان ته ورسوم، د آلمان حکومت او خلکو ته به قناعت ورکړم او هغوی ته به حقیقتونه او د سترګو لیدلی حال ووایم، چې له تاسو سره همکاري وکړي.

په دې ناسته کې د وزارت د مقام او د پلان او پالیسۍ رییسانو هم ګډون کړی و.