د خوګیاڼو ولسوالۍ له علماو، مخورو او قومي مشرانو سره ناسته ترسره شوه

د مهاجرینو او راستنېدونکو چارو سرپرست وزیر الحاج خلیل الرحمن حقاني ننګرهار ولایت ته د خپل سفر پرمهال د خوګیاڼو ولسوالۍ له علماو، مخورو او قومي مشرانو سره په داسې حال کې ولیدل، چې ددغه ولایت مرستیال مولوي محمد سعید بنوري، د عامې روغتیا رئیس مولوي امین الله او د مهاجرینو چارو رئیس حاجي بازمحمد یې هم ملتیا کوله
د مهاجرینو چارو وزیر په خپلو خبرو کې وویل: د خوګیاڼو قومونو د هر اشغال په مقابل کې بېسارې قربانۍ ورکړي او اوسنی امنیت او اسلامي نظام ددغه سترو قربانيو ثمره ده
نوموړي د قومونو په یووالي او اتفاق ټینګار وکړ او له ولسونو یې وغوښتل، چې راستنېدونکو مهاجرینو سره په هره برخه کې چې وسه یې ولري مرسته وکړي او د هغوی لاسنیوی وکړي
قومي مشرانو خوګیاڼو ولسوالۍ ته په ورتګ له ښاغلي حقاني خوښي څرګنده کړه او خپلې ستونزې او مشکلات یې ورسره شریک کړل
د مهاجرینو چارو وزیر ډاډ ورکړ، چې ستونزې به یې له اړوندو ارګانونو سره شریکې او د حل لپاره به یې هلې ځلې وکړي