دکډوالو چارو وزارت دشمالي وزيريستان بېځايه شوو ته د ښې رسېدنې په موخه ناسته و کړه
دغه ناسته دتېرې چهارشنبې په ورځ د غبرګولي په ۸ مه دکډوالو او راستنېدونکو چارو وزارت د پناه غوښتونکو مرستيالې په مشرۍ په ياد وزارت کې ترسره شوه.
په کابل کې دملګرو ملتونو دکډوالو ادارې (UNHCR) د دفتر رئيسې اغلې کرولاين ون بيورن، دقومونو او قبايلو چارو وزارت مرستيال محمد يعقوب احمدزي، دملي امنيت شورا او ملي امنيت د رياست استازو هم په دغه ناسته کې شتون درلود، چې پکې په خوست ولايت کې دشمالي وزيرستان بېځايه شوو ته درسېدنې او مديريت په اړه خبرې اترې وشوې.
د پناه غوښتونکو چارو مرستيالې په خوست ولايت کې دملګروملتوونو دکډوالو ادارې د دفتر له تړلو څخه د اندېښنې ترڅنګ د شمالي وزيرستان بېځايه شوو سره دهغې ادارې دهمکاريو غوښتنه وکړه او ويې ويل، چې د هغو کورنيو دماشومانو دښوونې او روزنې او ښوونځيوته دهغوی دلاس رسي موضوع مهمه ده. هغې د قومونو او قبايلو چارو زارت څخه وغوښتل چې ددغه کورنيو ماشومانو دې ددوی په ښوونځيو کې شامل کړي.
په کابل کې دملګرو ملتونو دکډوالو ادارې (UNHCR ) رئيسې وويل، په خوست ولايت کې ددوی دفتر د جون د ۳۰مې نېټې څخه د زيات لګښت له امله تړل کېږي. خو دشمالي وزيرستان بېځايه شوو سره به ددغې ادارې مرستې له کابل څخه هماهنګې شي. هغې زياته کړه په هغو سيموکې د بېځايه شوو لپاره ښوونځيو پراختيا موندلې او هلته يو حرفوي ښوونيز مرکز هم زياتوو. زموږ مرستې د روغتيا او پوهنې په برخه کې دي او دوام به وکړي.
په ناسته کې روښانه شوه چې په ټوله کې په خوست او پکتيا ولايتونوکې دشمالي وزيرستان ۶۲ زره بېځايه شوي کسان ژوند کوي.
