د راستنېدونکو د دوامداره بيا يوځای کېدو په اړه د ژنوا د ژمنو پلي کولو په اړه دحکومت د همغږۍ ناسته وشوه
دغه ناسته د کډوالو او راستنېدونکو چارو د وزير نور الرحمن اخلاقي په مشرۍ ترسره شوه او د ژنوا په ناسته کې د راستنېدونکو د دوامداره بيا يوځای کېدو په اړه د افغانستان د ژمنو د پلي کولو په څرنګوالي خبرې وشوې.
د ملګرو ملتونو دکډوالو ادارې UNHCR د اسيا او اقيانوسيه رئيس انديکارتواتی په کابل کې يې همکارانو، د پوهنې وزارت د تضمين کيفيت مرستيال دوکتور سردار محمد رحمي، د کليو پراختيا وزارت د برنامو مرستيال دوکتور پوپل حبيبي او د روغتيا وزارت ، کرنې او مالدارۍ او کار او ټولنيزو چارو وزارت استازو په دغه ناسته کې شتون درلود.
د کډوالو او راستنېدونکو چارو وزير وويل: د کډوالو او راستنېدونکو چارو وزارت هڅه کوي چې د ژنوا په ناسته کې د افغانستان ژمنې او د سيمه ييز ې ستراتېژۍ د ملاتړ اصلي ډلې ژمنې پوره کړي، چې موخه د ملي لومړيتوبو په پام کې نيولو سره د راستنېدونکو دوامداره بيا يوځای کېدل او ددوی نه په اغيزمنه توګه ساتنه کول دي.
د هغه په وينا د کډوالو او راستنېدونکو چارو وزارت تل په ملي او نړيوالو ناستو کې د لومړيتوبونو په سيمو او د ښارګوټو په پراختيايي برنامو ټيڼکار کړی.
په ورته وخت کې د ملګرو ملتونو دکډوالو ادارې د اسيا او اقيانوسيا رئيس د ژنوا د ژمنو او د ملاتړ د اصلي ميکانيزم ناستې په اړه وويل: افغان حکومت او نړيوالو همکاران مرسته کوي ترڅو راستنېدونکو او بېځايه شوو ته په عمل کې ګټور خدمات وړاندې کړي. د دولتي ادارو استازو هم د کډوالو او راستنېدونکو چارو وزارت سره د راستنېدونکو د دوامداره بيا يوځای کېدو او د ژنوا د ناستې د موخو په ترلاسه کولو کې خپله بشپړه همکاري اعلان کړه.
