د جاپان سفیر د مهاجرینو چارو سرپرست وزیر سره ولیدل

په افغانستان کې د جاپان سفير ښاغلي تاکایوشي کورومایا د مهاجرینو او راستنېدونکو چارو له سرپرست وزیر الحاج خلیل الرحمن حقاني سره د ده د کار په دفتر کې ولیدل.
په دغه ناسته کې د جاپان هېواد د بشري مرستو پر بهیر او څرنګوالي خبرې وشوې.
ښاغلي کورومایا په خپلو خبرو کې له پاکستانه د راویستل شویو مهاجرینو د ښه مدیریت له امله د مهاجرینو چارو وزارت د فعالیتونو ترڅنګ، په افغانستان کې د ډاډمن امنیت، اداري فساد او مخدره توکو سره د مبارزې په برخه کې د اسلامي امارت د هڅو ستاینه وکړه.
نوموړي وویل: جاپان اراده لري، چې له افغانستان سره خپلو خبرو او اړیکو ته په لوړه کچه دوام ورکړي، هغه له افغانستان سره د پخوانیو مرستو یادونه وکړه او ډاډ یې څرګند کړ، چې د دغه هېواد مرستې به دوام ومومي.
د مهاجرینو چارو وزیر نوموړي ته له ښه راغلاست وروسته په بېلابېلو برخو کې د جاپان د بشري مرستو مننه وکړه.
ښاغلي حقاني د راستنو شویو مهاجرینو او داخلي بېځایه شویو پر ستونزو او اړتیاوو رڼا واچوله او د مهاجرینو لپاره د سرپناه، پوهنې، روغتیا، حرفوي زدکړو او کاري فرصتونو په برخه کې یې د مرستو غوښتنه وکړه.