د مهاجرینو وزارت مسلکي مرستیال فاریاب کې د یوه روغتیايي مرکز د جوړولو بهیر وکاته
د مهاجرینو او راستتنېدونکو چارو وزارت مسلکي مرستیال مولوي عبدالرحمن راشد فاریاب ولایت ته د خپل سفر په ترڅ کې د دغه ولایت له سیمه ییزو چارواکو سره په قیصار ولسوالۍ کې د یوه روغتیايي مرکز د جوړېدو بهیر وکاته.
دا مرکز د بې ځايه شويو او راستنېدونکو لپاره د روغتيايي خدمتونو د وړاندې کولو په موخه جوړ شوی، چې په بېلابېلو برخو کې ٢٩ خونې لري او د ملګرو ملتونو عالي کمېشنرۍ په مالي مرسته د ٤٦٠ زره امريکايي ډالرو په لګښت په شپږو میاشتو کې جوړېږي.
د وزارت مسلکي مرستیال وویل: د دغه روغتیايي مرکز د کار په بشپړېدو به د قیصار ولسوالۍ د خلکو ستونزې هوارې شي. نوموړي د دغه مرکز پر معیاري کار ټینګار وکړ او مسولینو ته یې لازمې لارښوونې وکړې.
