سلګونه مهاجرین په جبري توګه له پاکستان څخه راستانه شول
۷۱۲ تنه افغان مهاجرین پرون د غبرګولي پر ۱۱مه او ۱۲مه د تورخم او سپین بولدک له فرضي کرښو څخه خپل هېواد ته راستانه شول.
د ننګرهار ولایت د تورخم سرحدي آمریت د معلوماتو له مخې، ۷۰ کورنۍ چې ۳۷۰ تنه کېږي په جبري توګه له پاکستان څخه راستنې شوې او هلته د مهاجرینو له ریاست سره تر نوم لیکنې وروسته د نورو مرستو په موخه د ملګرو ملتونو عالي کمېشنرۍ او د مهاجرت نړیوال سازمان دفترونو ته ور وپېژندل شوې.
او دکندهار ولایت د سپین بولدک سرحدي آمریت د معلوماتو له مخې، ۵۷ کورنۍ چې ۳۳۰ تنه کېږي او ۱۲ تنه له بنده خوشي شوي بندیان په جبري توګه له پاکستان څخه راستانه او هلته د مهاجرینو له ریاست سره تر نوم لیکنې وروسته د نورو مرستو په موخه د ملګرو ملتونو عالي کمېشنرۍ ، د مهاجرت او د خوړو نړیوال سازمان دفترونو ته ور وپېژندل شول او له ټولو کورنیو سره د اسلامي امارت له کړنلارې سره سم د لس لس زره افغانیو په ارزښت مرسته وشوه.