ننګرهار کې د اقتصادي او انکشافي پرمختیا ناسته وشوه
![-](/sites/default/files/2024-04/%D9%86%D8%B4%D8%B3%D8%AA%20%D9%85%D8%B9%D8%A7%D9%88%D9%86%20%D9%88%D8%A7%D9%84%DB%8C%20%D9%88%D9%84%D8%A7%DB%8C%D8%AA%20%D9%86%D9%86%DA%AF%D8%B1%D9%87%D8%A7%D8%B1.jpg)
د اقتصادي او انکشافي پرمختیا ناسته د وري پر ۱۵مه د ننګرهار د مرستیال والي په مشرۍ د اړوندو دولتي او خصوصي ادارو د استازو په شتون کې وشوه.
په دې لیدنه کې د امنیت، اقتصادي او انکشافي پرمختیا، بشري مرستو، د کورنیو د راستنېدو لپاره پر چمتووالي او نورو بېلابېلو برخو په اړه خبرې وشوې.
د والي مرستيال مولوي سعيد احمد بنوري په دغه ولايت کې د امنيت د ټينګښت ډاډ ورکړ او له پاکستان څخه د راستنېدونکو کورنيو د د دويمې څپې د مديريت او لاسنیوي په برخه کې یې د همکارۍ غوښتنه څرګنده کړه.
نوموړي د وروستیو اورښتونو له امله د اوښتو زیانونو په اړه هم معلومات شریک کړل او پېښو ته د رسېدنې او د بېړنیو مرستو لپاره یې وړاندیزونه وکړل.
مرستيال والي په يو شمېر ولسواليو کې د بېلابېلو پروژو د پلي کېدو، د بارانونو له امله د زيانمن شويو پروژو او ځايونو د بيارغونې غوښتنه هم وکړه او مرستندويه ادارو ته يې په هر ډول قانوني چارو کې د همکارۍ ډاډ ورکړ.
د ننګرهار ولایت د مهاجرینو چارو رییس بازمحمد عبدالرحمن د راستنیدونکو مهاجرینو د شمېر په اړه معلومات ورکړل او زیاته یې کړه، چې په دغه ولایت کې اویا سلنه مهاجرین پاتې دي او د جبري راستنېدونکو کورنیو د دویمې څپې د مدیریت په برخه کې د همکارۍ غوښتنونکی شو.
د همکارو بنسټونو استازو هم خپل نظریات وړاندې کړل او د خپلې همکارۍ ډاډ یې څرګند کړ.