د وزارت مسلکي مرستیال د پناه غوښتونکو په چارو کې د ملګرو ملتونو د عالي کمیشنرۍ له رییس سره وکتل
د مهاجرینو او راستنیدونکو چارو وزارت مرستیال مولوي عبدالرحمن راشد په افغانستان کې د ملګرو ملتونو د پناه غوښتونکو د عالي کمېشنرۍ له رییس ښاغلي لیونارد زولو سره په خپل کاري دفتر کې وکتل.
په دې کتنه کې د پخوانيو پروژو په برخه کې د وزارت او دغه کمیسیون ترمنځ د همغږۍ او همکارۍ په اړه خبرې وشوې.
د وزارت مسلکي مرستیال په همکارۍ، د تعهداتو په پوره کولو، د دواړو لورو تر منځ د باور په لا زیاتولو، د ستونزو په حل او له دغه کمیسیون څخه د خدمتونو په وړاندې کولو باندې ټینګار وکړ.
ښاغلي زولو له دغه کمېسیون سره د دغه وزارت د همکارۍ او همغږۍ ستاینه وکړه او په راتلونکي کې یې هم له خپلو همکارانو سره په بېلابېلو برخو کې د دغې ادارې د ملاتړ ډاډ ورکړ.
