جبري راستنېدونکو د عمومي وضعيت سره د مبارزې کمېسيون د ننګرهار ولايت د اجرائيه کمېټې له کړنو څخه څارنه وکړه
د مهاجرینو چارو وزارت مسلکي معین مولوي عبدالرحمن راشد ننګرهار ولایت ته د خپل سفر په ترڅ کې د جبري راستنېدونکو د وضعیت د څېړلو کمیسیون په مشرۍ د اجباري راستنېدونکو په برخه کې د ولایتي اجرایوي کمیټې له کړنو څخه څارنه وکړه. پلاوي د ولایت مقام له استازي او نورو چارواکو سره په لیدنه کې د جبري راستنېدونکو له پاره په وخت رسېدنه او د یوې انتظار خونې، د تورخم په پوله کې د یوه تشناب او د ۵۰۰ کډوالو له پاره په لعل پورې ولسوالۍ کې د موقتي کمپ په جوړولو ټینګار وکړ. یاد کمیسیون د ا.ا.ا د رئیس الوزاء د عالي مقام د حکم پر اساس د راستنېدونکو د عمومي وضعیت د څېړلو، د سرپناه جوړولو او د هغوی د عاجلو اړتیاوو د حل په موخه د مهاجرینو چارو وزارت مسلکي مرستیال مولوي عبدالرحمن راشد په مشرۍ او په ترتیب سره د پېښو پر وړاندې د مبارزې، عامې روغتیا، کرنې او مالدارۍ، د کلیو د بیا رغونې او پراختیا وزارتونو د مرستیالانو او د سرې میاشتې استازي په ګډون د جبري راستنېدونکو وضعیت ته د رسېدو په موخه د موقتي کمپونو د جوړولو او دوی ته د خدماتو د وړاندې کولو په موخه توظیف شوی دی.
