مسلکي مرستيال: اجراآت بايد د پلان مطابق او پروخت ترسره شي
د مهاجرينو او راستنېدونکو چارو وزارت مسلکي مرستيال مولوي عبدالرحمن راشد د دغه معينيت اړوند رئيسانو او آمرينو سره په ناسته کې وويل، اجراآت بايد د پلان مطابق او پروخت ترسره شي.
هغه د نيمګړتياوو څخه پاک د دقيق کاري پلان،د دندو د نه مداخلې او پروخت د اجراآتو د ترسره کولو په اړه خبرې وکړې ټينګار يې وکړ، چې چې هره څانګه بايد د پلان مطابق په ټاکلي وخت کې خپلې موخې تر لاسه کړي.
همدارنګه مولوي راشد د هرې ادارې د مسؤلينو او کار کوونکو حاضري د ټاکل شوو موخو په تر لاسه کولو کې مهمه وبلله ويې ويل، چې بېځايه غير حاضري د موخو په ترلاسه کولو کې د ځنډ لامل ګرځي او په دې برخه کې بايد ځانګړې پاملرنه وشي.
دغه راز د اجراآتو د لاښه والي او د نيمګړتياوو دله منځه وړلو په موخه د ګډنوالو ترمنځ د نظرونو تبادله او خبرې وشوې.
