د مهاجرينو چارو وزارت مرستيال د قندهار ولايت د والي سره ليدنه وکړه
![-](/sites/default/files/2022-11/qndhar2.jpg)
د مهاجرينو او راستنېدونکو چارو وزارت مرستيال الحاج محمد ارسلاح خروټي د لړم په (۲۲) مه د قندهار ولايت د والي الحاج محمد يوسف وفا سره ليدنه وکړه.
په دغه ليدنه کې دواړو لوريو راستنېدونکو او بېځايه شوو ته د غوره او پروخت خدماتو وړاندې کولو په اړه خبر ې وکړې.
والي ژمنه وکړه چې د قندهار ولايت رهبري به په خپل ټول توان سره د مهاجرينو چارو وزارت د برنامو د پلي کولو ملاتړ کوي او هڅه به وکړي چې د لا همکاريو لپاره زمينه برابره شي.
ښاغلي خروټي د دغه ولايت د والي څخه مننه وکړه ويې ويل، د مهاجرينو او راستنېدونکو چارو وزارت هڅه کوي چې د دولتي او مرستندويه بنسټونو په همکارۍ د راستنېدونکو او داخلي بېځايه شوو شته ستونزو هوارې کړي او په بېلابېلو برخو کې ورته اسانتياوې رامنځ ته کړي.
د يوبل خبر له مخې د مهاجرينو چارو وزارت مرستيال قندهار ولايت ته د خپل سفر په جريان کې په پنجوايي ولسوالۍ کې د مهاجرينو د ښارګوټي څخه ليدنه وکړه او د مهاجرينو چارو رئيس د ښارګوټي په اړه معلومات ورکړل.
د هغه په خبره چې دغه ښارګوټي (۱۰۶۰) نمرې او د (۴۰) زره لېتره په ظرفيت سره د اوبو خيره او اوبو رسونې شبکه لري، چې د دې ښارګوټي ټول اوسېدونکو ته د څښاک اوبه برابروي.
ښاغلي خروټي په ښارګوټي کې شته ستونز وڅېړلې ژمنه يې وکړه، چې د مهاجرينو چارو وزارت به د اړوندو ادارو او مرستندويه بنسټونو په همکارۍ د ياد ښارګوټي د اوسېدونکو اساسي اړتياوې پوره کړي.
همداراز د وزارت مرستيال د قندهار ولايت سپين بولدک ته ولاړ او د مهاجرينو سرحدي آمر، الله محمد د افغان مهاجرينود راستنېدو د بهير او دهغوی د ژوندانه د ستونزو په اړه د وزارت مرستيال ته معلومات ورکړل او ښاغلي محمد ارسلاح خروټي په سپين بولدک کې د افغان مهاجرينو ستونزې او ننګونې وڅېړلې او د حل په موخه يې اړوندو ادارو ته لازمې لارښوونې وکړې.
د مهاجرينو چارو وزارت مرستيال دوه ورځې وړاندې د راستنېدونکو او بېځايه شوو د ستونزو او د قندهار ولايت د مهاجرينو چارو رياست د فعاليتونو د څېړلو په موخه قندهار ولايت ته سفر وکړ.