د مهاجرينو او راستنېدونکو چارو سرپرست وزیر د سويل ختيځ زون د قومي شخړو د هواري شورا سره د قومي شخړو د هواري په موخه غونډه وکړه
د مهاجرينو او راستنېدونکو چارو سرپرست وزیر د پلاوي په ملتيا پکتيا ولايت ته سفر وکړ او هلته يې د سويل ختيځ زون د قومي شخړو د هواري شورا د چارو او لاسته راوړنو څخه ليدنه وکړه.
نوموړي د سويل ختيځ زون د قومي شخړو د هواري شورا سره د پکتيا ولايت د منګل بلخيلو او خوست ولايت صبريو زمبر قومونو ترمنځ د شخړې پای ته رسولو په موخه خبرې اترې وکړې، او ويې وويل چې د يو ساعت لپاره د وينې تويدو بنديدل د الله تعالی لوی نعمت دی، موږ د شخړو د هواري په موخه سرتور سر، پښې ابلې او په ننواتې هر چا ته ورځو او ترې غواړو چې دښمني او تربګني په ورورولۍ بدله کړي.
نوموړي زياته کړه چې ا.ا.ا په پوره توان سره هڅه کوي چې د هيواد ټولې رامنځته شوې شخړې په سولييز ډول پای ته ورسوي.
