د خليل الله خليل او التفات ښارګوټي تفصيلي او تطبيقي پلانونونه منظور شول
د کډوالو او راستنېدونکو چارو وزير نور الرحمن اخلاقي، د ښارجوړونې وزارت وزير محمود کرزي، د کابل والي محمد يعقوب حيدري او د پلازمينې زون د پراختيا عمومي رئيس نجيب الله شينواري ترمنځ نن د التفات او خليل الله خليل ښارګوټي تطبيقي پلان لاسليک او منظور شو.
په ناسته کې چې د ښارجوړونې وزارت کې جوړه شوې وه، دکډوالو او راستنېدونکو چارو وزير د ځمکو د مستحقينو پېژندلو لپاره خپلې هڅې اعلان کړې ويې ويل: زموږ تمرکز به د ولسمشرۍ ماڼۍ د ۱۰۸ ګڼه فرمان پلي کولو باندې وي چې ترټولو مستحقې کورنۍ وپېژندل شي.
همدارنګه د ښارجوړونې وزير د ولسمشرۍ ماڼۍ د ۱۰۸ ګڼه فرمان د نقشې او مسؤليت په اړه خبرې وکړې ويې ويل: د فرمان د احکامو عملي کول زموږ د دفتر د لومړيتوبونو څخه دي.
د کابل والي ، د کډوالو په برخه کې د ولسمشر سلاکار او د پلازمينې زون پراختيا ادارې عمومي رئيس هم د کارونو په اړه معلومات وړاندې کړل او ددې فرمان د احکامو د پلي کولو لپاره يې د لا همغړۍ پر اړتياباندې ټينګار وکړ.
د ذکر شوي پلان له مخې به په التفات ښارګوټي کې ۶۶۶۸ د استونګنې نمرې او د خليل الله خليل ښارګوټي کې ۱۵۰۰۰ د استوګنې نمرې د ۱۰۸ ګڼه فرمان له مخې مستحقينو ته ووېشل شي او ددې ترڅنګ په ښارګوټوکې شنې ساحې، تفريحي پارکونه او دعامه خدمتونو ځايونه هم په پام کې نيول شوي دي.
