د مهاجرینو چارو وزارت ۳۰ تنه کارکوونکو د انګلیسي او کمپیوټر زده کړې فراغت سندونه ترلاسه کړل
د مهاجرینو او راستنېدونکو چارو وزارت د مرکزي ریاستونو ۳۰ تنو کارکوونکو د انګلیسي او کمپیوټر د زده کړه ییزو برنامو تر بشپړولو وروسته د فراغت سندونه ترلاسه کړل.
په دې اړه جوړه شوې غونډه کې لومړی د یاد وزارت مالي او اداري معین ښاغلي شیخ کلیم الرحمن فاني د اسلام د سپېڅلي دین ارشاداتو ته په اشارې وویل: الله تعالی دې تاسو ته توفیق درکړي، چې له دغو زده کړو ګټه واخلئ، تر څو ولس او هېواد ته خدمت وکړئ.
هغه ټینګار وکړ، چې په هره څانګه کې تخصص ته اړتیا ده او د مسلکي کسانو لرل د ویاړ ځای دی.
وروسته د کارکوونکو چارو رییس ښاغلي مفتي مدیر ګل احمدي، د وزارت حقوقي سلاکار ښاغلي مولوي محمدجان خدرخیل له لوري د فراغت سندونه ورکړل شول او غونډه د دعا په ویلو پای ته ورسېده.
دغه برنامې د کارکوونکو د وړتیاوو لوړولو او مهارتونو پیاوړي کولو په برخه کې د مهاجرینو چارو وزارت هڅې څرګندوي.
