د کډوالو په چارو کې د ملګرو ملتونو عالي کمېشنرۍ مرستیاله: د کابل په کډوالو ښارګوټي کې نوی مېشتغالی او د قالین اوبدنې یوه کارخونه جوړېږي

د مهاجرینو او راستنېدونکو چارو وزارت د مسلکي معین ښاغلي عبدالرحمن راشد پر مشرۍ، په افغانستان کې د کډوالو په چارو کې د ملګرو ملتونو د عالي کمېشنرۍ له مرستیالې اغلې ونیسا ماتر بولي سره د کابل ښارولۍ استازي په شتون کې د کډوالو ستونزو ته د رسېدنې، نوي مېشتغالي او قالین اوبدنې کارخونې د جوړښت ارزونې په موخه ناسته وشوه.
ښاغلي راشد په کابل کې د دغه مېشتغالي او کارخونې جوړول له کډوالو سره د مرستې او کاري بوختیا په برخه کې غوره ګام یاد کړ او ویې ویل: دغه وزارت چمتو دی، چې له اړوندو بنسټونو سره همکاري وکړي او د ستونزو په حل کې هڅې وکړي.
نوموړي وویل: یاد وزارت په مختلفو برخو کې له موسسو سره همکاري کړې او چمتو دی، چې د کډوالو په ښارګوټو کې د مېشتغالو جوړولو لپاره د اړتیا وړ ځمکه ځانګړې کړي.
هغه زیاته کړه، چې په اوسنیو شرایطو کې د حکومت له لوري مختلفو کسانو ته د ځمکې وېش امکان نه لري؛ خو راستنېدونکو کډوالو ته د ملاتړو برنامو د اصولو په رڼا کې ځمکه ځانګړې کېږي.
د یادې کمېشنرۍ مرستیالې اغلې ونیسا د مهاجرینو چارو وزارت له همکاریو په مننې وویل: دغه کمېشنرۍ غواړي، چې د همکارو بنسټونو په همکارۍ د کابل ښار په پلچرخي سیمه کې یو مېشتغالی او د قالین اوبدنې یوه کارخونه جوړه کړي، تر څو راستنو شویو ته بېلابېل خدمتونه وړاندې شي. د مېشتغالي او کارخونې ابتدايي نقشه جوړه او د پړاوونو تر بشپړولو او د ځمکې ستونزې تر حل وروسته به یې د جوړښت چارې پيل شي.
همدارنګه اغلې ونیسا وویل: د دغه بنسټ د نغدي مرستو مرکز تر دې وړاندې د کابل ښار په پلچرخي سیمه کې کډوالو ته نغدي مرستې چمتو کولې، اوسمهال پرېکړه شوې، چې د مهاجرینو چارو وزارت او نورو بنسټونو په همکارۍ کډوالو ته بېلابېل خدمتونه وړاندې کړي.
د کابل ښاروالۍ استازي د دغه اقدام د ستاینې تر څنګ راستنو شویو ته مرستې رسول غوره کار وبلل او ویې ویل: د هغوی ستونزو کمولو لپاره ګډې همکارۍ ته اړتیا ده، د کابل ښاروالۍ هڅه کوي، چې ستونزې له اړوند مسوولینو سره شریکې کړي او د یاد وزارت په همکارۍ یې د حل هڅې وکړي، تر څو راستانه شوي له ډېرو خدمتونو او اسانتیاوو برخمن شي.