په مهاجرینو چارو وزارت کې د اداري پروسو اسانولو برنامه تر سره شوه

په مهاجرینو چارو وزارت کې د ا.ا.ا د چارو ادارې عمومي ریاست د استازو، د یاد وزارت د رییسانو او ځینو امرینو په شتون کې د اداري پروسو اسانولو برنامه تر سره شوه.
په پیل کې د یاد وزارت مالي او اداري معین محترم شیخ کلیم الرحمن فاني د اداري پروسو اسانولو پر اهمیت ټینګار وکړ او ویې ویل، چې له دې سره به ډېری ستونزې هوارې شي.
هغه زیاته کړه، هر څومره چې انسان په سختیو کې ژوند وکړي، له ډېرو ستونزو سره مخ کېږي، د اسلام مبین دین د چارو پر اسانولو او روڼتیا ټینګار کړی دی.
همدارنګه نوموړي وویل: که اداري پروسې اسانه نه شي؛ نو ښایي مراجعین او کار کوونکي له ګڼو ستونزو سره مخ شي.
د مهاجرینو چارو وزارت محترم مالي او اداري معین ورته برنامې د یاد وزارت په اداري چارو کې مثبت ګام یاد کړ.
وروسته د چارو ادارې استازي محترم نصیراحمد مجیدي د اداري پروسو اسانولو په اړه پرزینټېشن وړاندې کړ.
په پای کې ګډونوالو پوښتنې وکړې او ښاغلي مجیدي دغو پوښتنو ته ځواب وویل.