د هېواد په ۴ ولایتونو کې نږدې له ۷۰۰ کورنیو سره مرستې وشوې

روانه اونۍ په ننګرهار، پکتیکا، بغلان او لغمان کې له ۶۷۳ بېځایه شویو او راستنو شویو کورنیو سره نغدي، خېمو او کاري وسایلو مرستې وشوې.
د راپورونو له مخې، د دغه وزارت د دویمي واحدونو تر پېژندلو وروسته، د همکارو بنسټونو له لوري په ننګرهار کې ۲۹۰ کورنیو سره د ۲۳۲ زره افغانیو، د خیاطۍ او موبایل جوړونې وسایلو، خېمو، کمپلو او د اوبو فلترونو، په لغمان کې ۱۰۷ کورنیو سره ۳۷۱ زره او ۷۰ افغانیو، پکتیکا کې د پاکستان د بریدونو له امله له ۱۹۰ تازه بېځایه شویو کورنیو سره د خېمو او په بغلان کې له ۸۶ کورنیو سره د ۶۴۷ زره او ۴۰۰ افغانیو مرستې وشوې.
د یو بل خبر له مخې، د یاد وزارت د همکارو موسسو له لوري د کابل ښار په بېلابېلو ناحیو کې ۷ زره او ۲۱۸ تنو بېځایه شویو، راستنو شویو او اړمنو سره د ۲۰ میلیونو ۹۳۲ زره او ۲۰۰ افغانیو مرستې وشوې.