په ۳ ولایتونو کې تر ۱۴ زره ډېرو کسانو ته تر ۴۰ میلیونو زیاتې افغانۍ ووېشل وشوې

روانه اونۍ په کابل، بادغیس او لغمان ولایتونو کې ۱۴ زره ۵۶۳ اړمنو، بېځایه شویو او راستنو شویو کسانو ته ۴۲ میلیونه ۱۴ زره افغانیو نغدي، د لمریزې برېښنا وسایلو او د خیاطۍ وسایلو مرستې وشوې.
د راپورونو له مخې، د همکارو بنسټونو له لوري، د کابل ښار په مختلفو ناحیو کې ۱۴ زره ۴۶۰ تنو اړمنو تنو سره ۴۱ میلیونه ۹۳۴ زره افغانیو، لغمان کې ۵۳ تنو سره د لمریزې برېښنا وسایلو او بادغیس کې ۵۰ تنو مېرمنو سره د خیاطۍ وسایلو او ۸۰ زره افغانیو مرستې وشوې.
د یو بل خبر له مخې، ننګرهار کې د مهاجرینو چارو یاست تر پېژندلو وروسته، د همکارو بنسټونو له لوري ۲۷۵ بېځایه شویو او راستنو شویو کورنیو سره ۳ میلیونه او ۲۵ زره افغانیو مرسته وشوه.