په لغمان کې راستنو شویو کډوالو ته د ځمکې وېش پیل شو
د لغمان د کډوالو چارو ریاست د راپور له مخې، په دغه ولایت کې راستنو شویو کډوالو ته د ۱۰۵۰ جریبه ځمکې وېش د کور او ښار جوړولو وزیر او د نورو سیمه ییزو چارواکو په شتون کې پیل شو.
په دې تړاو جوړو شویو مراسمو کې د کور او ښار جوړولو وزیر مولوي نجیب الله حیات حقاني وویل: د افغانستان اسلامي امارت رهبرۍ کډوالو ته د خدمتونو او هغوی ته د ځمکې پر وېش ټینګار کوي، موږ هڅه کوو، چې د کډوالو ستونزې حل کړو.
د لغمان والي قاري بختیار معاذ د ځمکې پر وېش خوښي څرګنده کړه او ویې ویل، چې د ټولو راستنو شویو کډوالو کورنیو د ستونزو حلولو هڅې کوي، تر څو په دې ولایت کې د هر راستانه شوي ستونزو ته رسېدنه وشي.
د لغمان د کډوالو چارو رییس مولوي غلام الرحمن بلال وویل: تر اوسه ۱۳ زره او ۵ سوه کورنۍ راستنې شوې، چې له ډلې یې ۱۴ سوه د ځمکې وېش لپاره مستحقې پېژندل شوې دي.
د یاد ولایت د کور او ښار جوړولو رییس پر وینا، د مرکز اړوند سیمه کې د ۱۰۵۰ جریبې ځمکې تطبیقي پلان بشپړ او وېش یې پیل شو. همدارنګه په دغه ولایت کې ۵ زره ۳ سوه او ۸۰ جریبه نوره ځمکه کډوالو ته ځانګړې شوې ده، چې په نیږدې راتلونکې کې به یې وېش پیل شي.
راستنو شویو د اسلامي امارت له هڅو مننه او له هغوی څخه یې د کاري فرصتونو غوښتنه وکړه.