د کډوالو او راستنېدونکو چارو وزیر محترم مولوي عبدالکبیر د کار او ټولنیزو چارو وزارت د معین مولوي جانان آغا احمدزي په ملتیا، لوګر ته له پاکستان څخه د راستنو شویو هېوادوالو له استازو سره وکتل.
په دې ناسته کې حاضرینو په لوګر کې د مېشتو کډوالو د ژوند د حالت په اړه معلومات له محترم وزیر سره شریک کړل او زیاته یې کړه، چې څو کاله وړاندې له پاکستان څخه هېواد ته راستانه شوي، خو تر دې مهاله ورته د استوګنې نمرې نه دي ورکړل شوې.
د مهاجرینو استازو د خپلو خبرو پر دوام وویل، چې اسلامي امارت د راستنېدونکو لپاره ګڼې اسانتیاوې په پام کې نیولې دي او هیله یې څرګنده کړه، چې پخوانیو راستنو شویو ته به هم د حکومت لخوا د اړتیا وړ خدمات وړاندې شي.
د ناستې پر دوام د لوګر د مهاجرینو استازو خپل وړاندیزونه او غوښتنې له محترم وزیر سره شریکې کړې.
محترم مولوي عبدالکبیر راغلو مخورو او د کار او ټولنیزو چارو وزارت معین ته ښه راغلاست وویل او زیاته یې کړه، چې اسلامي امارت د حشر په ډول ټولو امارتي ادارو ته د کډوالو د ښه خدمت په موخه دندې سپارلې دي.
محترم وزیر لوګر ته د راستنو شویو وړاندیز ته په اشارې یادونه وکړه، چې له ارزونې او اداري پړاونو له بشپړولو وروسته به ورته د ځمکو وېش ته لاره هواره شي.
محترم مولوي عبدالکبیر څرګنده کړه، چې په جبري ډول راستانه شوي هېوادوال له ګڼو ستونزو سره مخ وو، خو له نیکهمرغه د اسلامي امارت په هڅو او مالي ملاتړ، له ایران او پاکستان څخه د راستنو شويو ښه خدمت وشو او اسلامي نظام ژمن دی، چې د اوسنیو او پخوانیو راستنو شویو هرې ستونزې ته به رسېدنه کوي.
