په افغانستان کې د ملګرو ملتونو مرستیالۍ د پلاوي استازي او مهاجرینو وزارت تر منځ ناسته وشوه
په افغانستان کې د ملګرو ملتونو د مرستیالۍ استازو، د مهاجرینو او راستنېدونکو چارو وزارت استازو تر منځ ناسته وشوه.
په دې لیدنه کې د وزارت کاري پلانونو شریکولو او د ملګروملتونو د مرستیالۍ پلاوي سره په دې برخه کې همغږۍ باندې بحث او خبرې وشوې.
په دې لیدنه کې د راستنېدنې او بیا مېشتېدنې رییس مولوي شکر الله شاکر وویل: چې د دې وزارت او موسساتو لومړۍ کار داده چې د راستنېدونکو او بې ځایه شویو ستونزو هواري په موخه په ګډه اوهمغږۍ کار وکړي.
نوموړی په دې برخه کې د یاد سازمان همکارۍ غوښتونکی شو او زیاته یې کړه: د وزارت او اړوندو څانګو کارونه او فعالیتونه به هم درسره شریک کړو.
د داخلي بې ځایه شویو وضعیت ته د رسېدنې رییس مولوي سردار شیرزاد وویل: مهاجرینو وزارت د مظلوم او بې وزله استازولي کوي، نو لازمه ده، چې په دې برخه کې د راستنو شویو او داخلي بې ځایه شویو ستونزو ته د پای ټکی کېږدو.
د دایمي حل لارو د پیدا کولو رییس مولوي شمال خان مصلح هم خبرې وکړې او هغه د ولس لپاره د بنسټیزو کارونو په تطبیق او لومړیتوبونو کې د لا ښې اسانتیا غوښتنه وکړه.
د ملګرو ملتونو د سرمنشي د دايمي حل لارې استازي ښاغلي خالد وويل: موږ هڅه کوو چې د هېواد د خلکو په ځانګړې توګه د راستنېدونکو او بې ځايه شويو لپاره يو څه وکړو، څو د هغوى ستونزې په همغږۍ او همکارۍ سره هوارې کړو.
هغه په راتلونکو ناستو کې د وزارت، اړوندو ادارو او موسساتو د راتلونکو پلانونو په لا زیاتې همغږۍ ټینګار وکړ.
