مالي او اداري مرستيال دناروې دکډوالو ادارې عمومي رئيسې سره ليدنه وکړه
د کډوالو او راستنېدونکو چارو وزارت مالي او اداري مرستيال ولي الله جلال شنبه د غوايي په ۱۱مه په افغانستان کې د ناروې دکډوالو ادارې (NRC) عمومي رئيسې ميرمن آستريت اورين سيلتن سره په خپل کاری دفتر کې ليدنه وکړه.
په دغه ليدنه کې چې په کډوالو چارو وزارت کې ترسره شوه، دواړو لوريو په هرات ولايت کې د داخلي بېځايه شوو سره د بېړنيو بشري مرستو او ددې پروسې پروړاندې پر ستونزو او ننګونو خبرې وکړې.
ټاکل شوې راتلونکو دريو مياشتوکې په هرات ولايت کې داخلي بېځايه شوو او اړمنو کورنيو ته دناروې دکډوالو ادارې له لورې دبشري مرستو دوېش لړۍ د کډوالو او راستنېدونکو چارو وزارت تر څارنې لاندې پيل شي.
د کډوالو او راستنېدونکو چارو وزارت مالي او اداري مرستيال داخلي بېځايه شوو او اړمنو کورنيو ته د مرستو د وېش په روڼتيا ټينګار وکړ.
همدارنګه ميرمن آستريت اورين سيلتن سږ کال په افغانستان کې د فعاليتونو او برنامو په اړه هم معلومات ورکړل او ژمنه يې وکړه، چې دا فعاليتونه به د کډوالو او راستنېدونکو چارو وزارت سره په همغږۍ ترسره شي.
