فراه ولایت کې د ښارګوټي د جوړولو په موخه زرګونه جریبه ځمکه د کډوالو او راستنېدونکو چارو وزارت ته ولېږدول شوه
د فراه ولایت په شیبکوه ولسوالۍ کې د کډوالو لپاره د ښارګوټي د جوړولو په موخه ۵ زره او ۵۰۰ جریبه ځمکه له کرنې، اوبو لګونې او مالدارۍ وزارت څخه د کډوالو او راستنېدونکو چارو وزارت ته ولېږدول شوه.
د دې ځمکې د لېږد هوکړه لیک وړمه ورځ د کب پر ۲۱ مه د کډوالو او بېرته راستنېدونکو چارو وزارت د راستنېدنې او بیا مېشتونې رييس مولوي شکرالله شاکر او د کرنې وزارت د اراضۍ ریاست د ځمکو د لېږد او وېش رييس مولوي سيد محمد سعید ترمنځ لاسلیک شو.
د یادونې وړ ده چې د ښارګوټي د جوړولو په موخه د کډوالو لپاره د ځمکې ځانګړي کېدل د کډوالو چارو او راستنېدونکو چارو وزارت د وړاندیز او د افغانستان د اسلامي امارت د زعیم عالیقدر امیرالمونین د حکم پر بنسټ په ټول هېواد کې ترسره کېږي.
