د کډوالو چارو وزارت او همکارو بنسټونو ترمنځ د لا زیاتو همغږۍ غونډه وشوه
د کډوالو او راستنېدونکو چارو وزارت او د بشري خیریه بنسټونو څېړنیز ټیم غړو ترمنځ غونډه د داخلي بېځایه شویو وضعیت ته د رسیدنې په ریاست کې جوړه شوه.
په دې غونډه کې ښاغلي نیکل تیمنس او آغلې کترینا مریکل د بشري خیریه بنسټونو د څېړنیز ټیم غړیو حضور درلود او د کډوالو چارو وزارت او همکارو موسسو ترمنځ د لا زیاتې همغږۍ او اړیکو په اړه بحث وشو.
د داخلي بېځایه شویو وضعیت ته د رسیدنې رییس مولوي سردار شېرزاد وویل: د کډوالو چارو وزارت د بېوزلو او مظلومو کډوالو استازیتوب کوي او دا وزارت هڅه کوي، چې په هېواد کې دننه او بهر کډوالو ته غوره خدمتونه وړاندې کړي.
نوموړي زیاته کړه: اسلامي امارت په هېواد کې غوره امنیت برابر کړی؛ ترڅو همکارې موسسې وکولی شي خپل خدمتونه د هېواد په ګوټ - ګوټ کې کډوالو ته وړاندې کړي او د دوی د اړتیاوو د پوره کولو لپاره نورې بشري مرستې ترسره شي.
شېرزاد په اړونده برخه کې د کډوالو چارو وزارت د همکارۍ ډاډ څرګند کړ.
ښاغلي نیکل تیمنس وویل: موږ به ستونزې وڅېړو او د همکارو موسسو او کډوالو چارو وزارت ترمنځ به لا زیاته همغږي رامنځته کړو؛ ترڅو ستونزې حل شي او د کډوالو لپاره د مرستو او همکارۍ غوره فرصتونه برابر کړو
