د کډوالو او راستنېدونکو چارو وزیر محترم مولوي عبدالکبیر د کويټ هېواد د پارلمان له پخواني غړي دوکتور دجیح خلف الشري او ورسره د خیریه بنسټ له غړي جارالله او سوداګر الشیخ فهد الهنان سره وکتل.
د ناستې په پيل کې دوکتور دجیح خلف الشري وویل، چې افغانستان ته یې د سفر موخه له اسلامي نړۍ او کویټ هېواد سره د اسلامي امارت د اړیکو پياوړتیا ده.
د ښاغلي الشري په وینا، چې د اسلامي هېوادونو ترمنځ نږدې او مثبتې اړیکې د وخت اړتیا ده او باید پياوړتیا ته یې کار وشي. نوموړي په افغانستان کې د اسلامي امارت له بریا وروسته د افغان ولس لاسته راوړنې وستایلې او یادونه یې وکړه، چې افغانان د پرمختګ او اقتصادي ودې له لپاره ګڼ فرصتونه لري.
ښاغلي الشري څرګنده کړه، چې له اسلامي نړۍ سره د اسلامي امارت د مثبتو او رغنده اړیکو لپاره به خپلو هڅو ته دوام ورکړي.
محترم مولوي عبدالکبیر د کویټ د پارلمان پخواني غړي او ورسره مل ملګرو ته ښه راغلاست و ویل او زیاته یې کړه، چې له اسلامي هېوادونو سره مثبتې اړیکې اسلامي امارت ته لومړیتوب لري.
د محترم وزیر په وینا، چې اسلامي امارت په افغانستان کې د مسوول نظام په توګه د هېواد د پرمختګ لپاره کار پيل کړي او هڅه کوي چې په سیمه کې د یوه اغېزمن نظام په توګه خپلو اقتصادي چارو ته دوام ورکړي.
