د کډوالو او راستنېدونکو چارو وزارت له موسساتو سره د لا ښې همغږئ او د کمکونو او فعاليتونو د اغيزمنتيا لپاره ناسته ترسره کړه
![ـــــــــــ](/sites/default/files/2021-10/dsc_4180.jpg)
1400کال، تلې، 13مه، کابل؛ افغانستان
د کډوالو او راستنېدونکو چارو وزارت د پالېسۍ او پروګرامونو د پلي کېدو چارو مرستيال، ښاغلي مولوي محمد مسلم حقاني په يوه ناسته کې، د یو شمیرموسسو له چارواکو سره د دوي د فعاليتونو، کمکونو او د پروژو په اغیزمن تطبیق باندې بحث او خبرې وکړې.
په دغه ناسته کې، چې د IRC) ، CHA ، UNION AID او DRC) موسسو چارواکو پکې برخه اخیستې وه، د کډوالو او راستنېدونکو چارو وزارت د پالېسۍ او پروګرامونو د پلي کېدو مرستيال د پروژو په پلي کولو کې د دې ادارو د فعاليتونو په اغېرمنتيا باندې ټینګار وکړ.
هغه زیاته کړه چې د پخوانیو او اوسنې تړونونو له مخې راستنیدونکي کډوالو ته د پیسو په ويش کې بايد پوره دقت او سم نظارت وشي؛ ترڅو اړمنو خلکو ته مرستې په شفاف ډول ورسېږي.
ښاغلی حقاني د دغو موسسو چارواکو ته د افغانستان اسلامي امارت له لوري د پوره همکارۍ ډاډ ورکړ او زیاته یې کړه، چې د دوي هر ډول ستونزو ته به په وخت رسېده ګي کېږي.
په دغه ناسته کې، د کډوالو او راستنېدونکو چارو وزارت د پلان او پالیسۍ رئيس مولوي ارسلا حقیار د دې موسساتو څخه وغوښتل، چې د خپلو پروژو پروپوزل او پلان دی دې وزارت ته وړاندې کړي؛ ترڅو وزارت ورسره په اړينو برخو کې لازمه همکاري وکړي.