د کډوالو او بېرته را ستنېدونکو چارو سرپرست وزیر محترم مولوي عبدالکبیر نن (چهار شنبه، د سلواغې ۲۴) د بغلان ولایت د اندرابونو د درېو ولسوالیو له یو شمېر قومي مشرانو او مخورو سره په خپل کاري دفتر کې وکتل.
په دې ناسته کې د اندرابونو قومي مشرانو او مخورو په سيمه کې د سرتاسري امنیت راتګ او د فساد او زورواکیو له منځه تللو ستاینه وکړه، د خلکو د هوساینې او اقتصادي اړتیاوو په اړه يې خپل نظرونه څرګند کړل. دوی وویل چې د اندراب ولسونه د اسلامي امارت له حاکمیت څخه خوښ دي او اوسنی امنیت یې د سکون سبب ګرځېدلی.
قومي مشرانو زیاته کړه چې اوس خلک کولی شي په ډاډه زړه د هېواد هر ګوټ ته سفر وکړي، دوی د مغرضو کړیو هغه تبلیغات رد کړل چې د اسلامي نظام پر وړاندې ترسره کیږي، او ټینګار یې وکړ چې د اندرابونو ولسونه به هیچاته د اسلامي نظام پر ضد منفي عمل ته پرې نه ږدي.
د کډوالو او بېرته را ستنېدونکو چارو سرپرست وزیر مولوي عبدالکبیر د قومي مشرانو له څرګندونو او ملاتړ مننه وکړه او زیاته یې کړه، چې اسلامي امارت د ولسونو هوساینې ته ژمن دی، د خلکو ستونزې درک کوي او هڅه کوي چې هره سیمه کې عدالت، امنیت او اقتصادي پرمختګ ته زمینه برابره شي.
په دې ناسته کې د سیمې د خلکو ستونزې او اړتیاوې هم مطرح شوې، چې محترم مولوي عبدالکبیر یې د حل لپاره د همکارۍ ډاډ ورکړ.
