د کابل ولایت څخه د بېځایه شویو کورنیو د انتقال په اړه ګډه ناسته ترسره شوه.
د مهاجرینو چارو د وزارت مسوولینو او په کابل ولایت کې د داخلي بې ځایه شویو کمپونو د استازو ترمنځ ګډه ناسته ترسره شوه.
په دغه ناسته کې لومړۍ داخلي بې ځایه شویو چارو ته د رسېدنې رییس مولوي سردارمحمد شېرزاد، د کابل ولایت د 48 کمپونو د انتقال طرحه او پلان، او د مهاجرینو د وزارت طرحه د هغو خلکو په هکله چې مخکې د مختلفو سببونو له لاسه له خپل ولایاتو څخه کابل ته بې ځایه شوي ول، جلسې ته وړاندې کړه. او ټینګار یې وکړ چې په افغانانو تپل شوي جنګ سلګونه زره کورنۍ بې ځایه کړې وې، اوس چې د هېواد په هر ګوټ کې امنیت تامین شوی، نو د دې وخت را رسېدلی هغه کورنۍ چې بې ځایه او متضررې شوي بېرته خپلو اصلي ولایاتو ته ستنې شي.
په ورته وخت کې د مهاجرینو چارو د وزارت د بې ځایه شویو کورنیو لپاره د دایمي حللارې د پیدا کولو رییس مولوي شمال خان د دې کورنیو د ځای پر ځای کولو او د حل لارې په هکله خبرې وکړې.
د دې ناستې په دوام کې د کابل ولایت د مهاجرینو چارو رییس مولوي عبدالمتین رحیمزي یادو شویو کورنیو ته د مرستو د توزیع، او د کابل ولایت د 48 کمپونو څخه د دغو کورنیو د انتقال په لارو چارو په تفصیلي توګه خبرې وکړې.
د دې ناستې په پای کې د کابل ولایت د بې ځایه شویو د کمپونو استازو خبرې وکړې او د مهاجرینو چارو د وزارت له دغه اقدام څخه یې مننه وکړه، او د انتقال د پروسې ستونزې یې بیان کړې، چې د مسوولینو لخوا واورېدل شوې.
