د کابل ولایت د مهاجرینو چارو ریاست نوي ځای ته ولېږدول شو
د کابل ولایت د مهاجرینو او راستنېدونکو چارو ریاست خپلو موخو ته د ښې رسېدنې او بې ځایه شویو او راستنېدونکو ته د لا زیاتو خدمتونو د وړاندې کولو په موخه له خپل پخواني ځای څخه نوي ځای ته ولېږدول شو.
په دې اړه د دوشنبې ورځ په جوړو شویو مراسمو کې چ ورځ د مهاجرینو او راستنېدونکو چارو وزیر الحاج خلیل الرحمن حقاني د کابل ولایت والي شیخ امان الله عبید او د مهاجرینو چارو وزارت ځینو مرکزي رییسانو ګډون کړی و.
ښاغلي حقاني په خپلو خبرو کې هیله څرګنده کړه، چې د کابل د مهاجرینو ریاست به وکولای شي له نویو اسانتیاوو څخه په ګټنې سره د خلکو لا ښه چوپړ او خدمت وکړي.
نوموړي د کاري بهیر د لیدنې پر مهال د دې ادارې کارکوونکو ته له مراجعینو سره د ښه چلند په اړه لازمې لارښوونې وکړې او په کاري برخه کې یې د شته ستونزو د حل او ورته د رسېدنې ډاډ ورکړ.
د کابل والي د خپلو خبرو په ترڅ کې له ګاونډیو هېوادونو څخه په جبري توګه راستنو شویو مهاجرینو ته د خدمت په برخه کې د مهاجرینو چارو وزارت د رهبرۍ د کار او مدیریت ستاینه وکړه.
د کابل ولایت د مهاجرینو چارو رییس مولوي عبدالرحمن حبیبزي د پخوا په پرتله د صادقانه او رښتینو خدمتونو په ترسره کولو کې د لا همغږۍ او همکارۍ ډاډ ورکړ.
