د وزارت مسلکي مرستیال زابل کې د يو ښوونځي د جوړېدو د چارو څارنه وکړه
د مهاجرینو او راستنېدونکو چارو وزارت مسلکي مرستیال الحاج مولوي عبدالرحمن راشد زابل ولایت ته په خپل سفر کې د یو ښوونځي د جوړېدو د چارو څارنه وکړه.
دغه ښوونځى چې د زابل ولايت د مرکز اړوند د خرواریان په کلي کې دی، ١٦ درسي ټولګي لري.
د جوړېدو چارې يې د ملګرو ملتونو د کډوالو عالي کمېشنرۍ له لوري د ٣سوه ٩٣ زره امريکايي ډالرو په ارزښت په دوه جریبه ځمکه کې جوړېږي.
ښاغلي راشد په دې کتنه کې د دغه ښوونځي د ساختماني چارو د ښه تطبیق او د ساختماني توکو د کیفیت د ښه والي په اړه د پلي کوونکي ساختماني شرکت مسولینو ته اړینې لارښوونې وکړې.
