د وزارت د راستنېدنې رئیس په افغانستان کې د IFRC موسسې له عملیاتي مدیر او د سرې میاشتې رئیس سره ولیدل

د مهاجرینو چارو د راستنېدنې او تازه یوځای کېدنې رئیس مولوي شاکرالله شاکر د سرې میاشتې رئیس محمد صالح اخوند زاده او د سره صلیب او سرې میاشتې ټولنو نړۍوال فدراسیون عملیاتي مدیر ښاغلي راد الحدید سره لیدنه وکړه.
په دې لیدنه کې د دواړو اړخونو ترمنځ له پاکستان څخه په جبري توګه راستنېدونکو ته د بشري مرستو په وړاندې کولو بحث وشو.
ښاغلي شاکر د اجباري راستنېدونکو شمېر چې له نارسمي پولو څخه هېواد ته راستنېږي له هغوی سره شریک کړ او ویې ویل:
تراوسه زرګونه کورنۍ له نارسمي پولو څخه راستانه شوي او ښايي راتلونکی کال په دې شمېر کې نور زیاتوالی هم راشي.
ښاغلی راد الحدید له پاکستان څخه په جبري ټوګه د راستنېدونکو په برخه کې د ښه مدیریت له امله د اسلامي امارت د رهبرۍ او مهاجرینو چارو وزارت هڅې وستایلې او په راتلونکي کې یې د خپلو ملاتړو په همکارۍ د مرستو د وړاندې کولو ژمنه څرګنده کړه.
دغه راز جانبین هم پر همغږۍ او لا نورو مرستو ټینګار وکړ.
په دې لیدنه کې د داخلي بې ځایه شوو وضعیت ته د رسیدنې رئیس مولوي سردار شیرزاد هم ګډون درلود.