د نبوي سیرت د سیالۍ د پایلو د اعلانولو غونډه د مهاجرینو په وزارت کې ترسره شوه
د نبوي سیرت د ازموینې چې څو ورځې وړاندې په وزارت کې اخیستل شوی وه، د پایلو د اعلانولو غونډه د وزارت د مرستیالانو، مرکزي رییسانو او د وزارت د کارکوونکو په شتون کې وشوه.
د وزارت مالي او اداري مرستیال الحاج محمد ارسلاح خروټي د څېړنې او معلوماتو ریاست له کارکوونکو څخه د دې پروګرام د جوړولو له امله مننه وکړه او دا یې یو نیک او مثبت ګام وباله.
ښاغلي خروټي زیاته کړه، د رسول الله (ص) د سیرت پیروي په دنیا او اخرت کې د خیر او خوشالۍ راوستونکې ده او هغه کسان چې په دې ازموینه کې یې مقام ترلاسه کړی، پکار ده چې د ادارې له خوا تقدیر او وستایل شي.
په دې غونډه کې د وزارت مسلکي مرستیال مولوي عبدالرحمن راشد هم خبرې وکړې او زیاته یې کړه، چې د مسلمانانو ښکلا او فضیلت د الله د رسول (ص) د سنتو او اخلاقو پیروي ده او پر مسلمانانو لازمه ده چې د پاک رب د پېغمبر له سنتو څخه خبرتیا ولري.
دغه راز د مهاجرينو د څيړنې او معلوماتو او د مرستو د همغږۍ رییسانو هم د موضوع په اړه خپلې خبرې وکړې.
غونډه د لومړي، دویم او درېم مقام ګټونکو ته د وزارت د مرستیالانو له خوا د ستاینلیکونو او جایزو په ورکولو سره پای ته ورسیده.
