د مهاجرینو چارو په وزارت کې د راستنېدونکو د غوره ملاتړ په موخه ناسته وشوه
د مهاجرینو او راستنېدونکو چارو وزارت د حقوقي ملاتړ په ریاست کې پنجشنبه د غویي ۲۷ مه د مهاجرت نړیوال سازمان د استازي په شتون کې د راستنېدونکو مهاجرینو د غوره ملاتړ په موخه ناسته وشوه.
د مهاجرینو چارو وزارت د حقوقي ملاتړ رییس الحاج غلام نبي الله داد خېل ستانکزي د دې ناستې موخه د راستنېدونکو مهاجرینو ستونزو ته په ښه ډول رسېدنه وبلله او زیاته یې کړه، چې ستونزو ته د رسېدنې لپاره د دوامداره ناستو او له یو بل سره د همکارۍ اړتیا ده.
هغه وویل: د مهاجرینو د ستونزو حل او د دوی د حقونو ملاتړ د مهاجرینو چارو وزارت او همکارو بنسټونو ګډ مسولیت دی.
د مهاجرت نړیوال سازمان استازي عبدالوارث القاسم د خپل سازمان پر ملاتړ او د افغان مهاجرینو حقونو ته د ښې رسېدنې لپاره پر ګډو همکاریو ټینګار وکړ.
